2011 - 練習一

久違了的練習，開始時有一點陌生。開始了，慢慢的，意念隨隨流轉，寫了一小段。

希望我真的可以再寫劇本，以另一種姿態、另一種心情、另一種節奏…… 希望我可以。

_______________________________________

【這是一間醫院內的一間病房，是男性病人的病房。房內六張病牀，但舞台上只見到窗旁的一張牀。這是某一天的黃昏時段，房內斷斷續續有醫療器材的聲音、咳嗽聲和粗重的呼吸聲。

燈亮，這張近窗的牀是空的，一位三十多歲的女士坐在牀旁的椅子上，背向觀眾，望向窗外。】

女：【自言自語】成6點幾都唔天黑…… 冬天噉就過完嘞…… 【望向身旁的病牀】天氣暖啲，可以帶你出去透吓氣嘞。【一頓】都唔知可以做乜嘢嘞，除咗呼吸，仲可以做乜嘢？只係淨番呼吸……

【她起來，走到窗旁，看出窗外。】

女：出邊所有嘢都喺度郁，雀仔飛嚟飛去，啲人行嚟行去，啲細路跳嚟跳去，你郁唔到，瞓喺度，睇到噉多嘢喺度郁，有無覺得眼花呀？【一頓】一定好攰嘞，又或者會唔會覺得好煩？【一頓】係，一定係好煩……

我點會唔知呢？瞓喺度一定好煩，甚至好嬲、好忟……【一頓】我又點解會知？我知咩呢？【一頓】都撐咗噤耐，如果我叫你唔好撐，我係咪好殘忍，好不孝呢？【一頓】人生只係得番呼吸，唔通又唔係另一種殘忍咩？

【其他病牀傳來咳嗽聲。】

未完待續...