得救見證 (口述版)

從沒試過如此膽怯在台上說話，在我這個不怕在人前表達自己的人，是特別和難忘的事。
_______________________________________________

各位弟兄姊妹，早晨！

我係Jessie鍾靜思，我係2009年6月14日開始參與中華聖潔會嘅崇拜，係Tammy梁穎茵帶我嚟嘅。

由我返哩個教會，一直到宜家，我一直覺得企喺哩個台上邊，一定係要講啲對人好有啟發嘅題目同說話。我亦一直從每一次嘅崇拜入面，從哩個台度學習到好多天父同主耶穌珍貴又永恒嘅教導。我覺得我嘅得救見證實在好微不足道，所以當我知道有得揀上唔上台講得救見證嘅時候，我諗都唔駛諗就揀唔上台。

另外，要睇到一個人真正得救，係要睇到一個人生命同價值觀真正嘅改變，有天父喺佢心入面。要俾人睇到哩啲，首先要認識哩個人以前係點樣，先可以比較到佢宜家嘅轉變。生命嘅轉變亦都好難喺三、兩分鐘嘅說話入面顯露出嚟。

事情嘅發展係，連最驚上台講嘢嘅Tammy都話我知改變主意，會上台講得救見證，又勸我話｢你覺得微不足道哩個係你覺得，天父點會噉睇呢？｣，我開始動搖嘞，於是我就禱告嘞。

我首先禱告就問天父，你係咪想我上台講呀？講俾所有人知我愛你，願意一生都跟隨你。問完哩個問題之後，心裡面有一把好強嘅聲音響起，話我知哩啲深情嘅說話一說出口就膚淺嘞。對住身邊愛錫我嘅家人、親人同朋友都講唔出口，宜家仲要上台講，所有嘅感情一講出口即刻就好淺薄嘞。當時我心裡面都附和哩把聲音，覺得，係啦，好淺薄…

過咗一陣，三兩分鐘後，有一把好溫柔嘅聲音喺我心裡面響起，｢靜思，我想你講俾我聽呀！你上台講俾我聽啦。｣我當時喺書店睇緊書，聽到之後都無立刻回應，繼續睇書；過咗一陣，哩把溫柔嘅聲音又響起，我離開書店，一個人行去地鐵站諗住搭地鐵返屋企，我再心裡面禱告再問天父，個把溫柔嘅聲音再同我講多一次，佢想我上台講得救見證。我就諗，要做一位屬神嘅女兒，首先第一步就係學習順服，將生命全然交俾天父。好啦，我就上台講得救見證啦。

跟住我就問天父，噉我講咩好呀？叮一聲，靈感就嚟嘞，就講由唔上台講得救見證到上台講啦。

我實在好感謝天父，喺我人生每一個唔同嘅階段同狀況，都一直拖帶住我，聽我禱告。我愛你，天父，我願意一生都跟隨你。

哩個係我嘅小小分享。周牧師同我講過得救見證要講嘅幾時決志、點樣認識主耶穌，我已經寫咗喺我書寫版本嘅得救見證嘞。多謝大家。