電話詐騙

我覺得香港其中一個最好笑、最有趣的電視節目是《警訊》。當你看到一班生硬但認真的演員，在重演那些應該在真實世界來得嚴重和複雜的案件時，你很難不捧腹大笑。原來，當那些案件重演發生在你身上時，有一刻，個心真係會離一離，感到心血少，想食保嬰丹定一定經的。

時：上星期某一早上
地：我家
人：我媽、我、小可愛﹙我最乖的小姪女﹚、電話裡的壞人一和壞人二

﹙嬰兒哭聲、大人哄嬰兒的話語。燈亮，電話響起，媽媽邊抱着在哭的小可愛，接聽電話。﹚

壞人一：﹙帶着哭﹚阿媽，我出咗事，出咗事，救我。

媽：吓？咩事呀？﹙拿電話聽了兩秒，惶恐地﹚阿女阿女，細佬出咗事呀，出咗事……﹙把電話交給在洗手間的我﹚

我：﹙正在洗澡，好香艷吓。接過電話﹚喂？

壞人二：﹙氣定神閒，帶點大佬架勢﹚你係佢邊個？

我：我係佢家姐。

壞人二：你細佬上個月同人上嚟借咗廿萬，宜家嗰個人走咗佬，我梗係要搵個擔保人架啦。

我：﹙一驚，不知所措又要扮鎮定﹚你哩度係咩地方、咩嘢公司？

壞人二：我哩度係無牌大耳窿。

我：﹙再驚，已經有啲口震，依舊扮鎮定﹚你……你有冇聯絡我細佬呀？

壞人二：你係咪傻架？我捉咗佢返嚟呀！﹙註：我事後諗番，都覺得自己係傻嘅。不過我係噉嘅人，嗰個人講啲唔講啲，我又唔知我媽之前聽到啲乜嘢，我係要問得一清二楚，要佢親口講個「fact」我知，噉先算有個「full picture」喺個腦度。﹚

我：﹙更驚，不過因為有「full picture」喺個腦度，反而鎮定咗﹚噉你俾我細佬同我講。

壞人二：xxxxxx，佢頭先同你阿媽仲未講夠呀？

我：﹙第一次俾人用粗口鬧竟然唔識嬲﹚我唔識你架喎，我都要搞清楚成件事架。你俾我細佬同我講呃。

壞人二：xxxxxx，頭先仲未講夠呀？

我：﹙感不耐煩﹚你俾……你等陣。﹙竟然錯手按了電話的音樂聲﹚媽媽，頭先你聽到啲咩呀？

媽：﹙仍抱着小可愛，但已停了哭聲﹚咪細佬喊住話「阿媽，我出咗事，出咗事！」囉。

﹙我再按電話，壞人二已收線。﹚

我立刻致電我弟弟，當然是虛驚一場。

我和媽媽實在沒想過警訊的情節會在我家發生，還配以小可愛的哭聲，令事情變得更煩亂和緊張。我弟弟笑我是傻的，竟然和他聊這樣久。我不介意認傻，只是當時面對這樣一個陌生人的電話，我確是很怕。幸好是，雖然怕，我還保有一點common sense，也深知我一定要面對它。難道我把那通電話拋回給我媽或是小可愛嗎？

我但願再面對任何讓我恐懼的事，我是真的鎮定。我也希望《警訊》的案件重演可以真實一點，演到多一點生活衝突的張力！

經濟不好，大家真要小心提防任何形式的騙案啊！